A propòsit deth Debat public qu'a possat er Estat francés, me semble qu'eth comonicat d' Iniciativa per Occitania mereish d'èster difusit:


Identitat nacionala ? Sèm occitans !

Dempuèi lo 2 de novembre s'es dobèrt, dins l'estat francés, un debat public sus l'identitat nacionala.
Aquel debat crida mai d'una remarca.

N'es a l'origina Eric Besson, ministre de l'immigracion e de l'identitat nacionala. Parlarem pas de las polemicas associadas a son percors politic, pr'amor que passèt brutalament en 2007 de l'equipa de la candidata socialista a la presidéncia francesa, Ségolène Royal, per sosténer son adversari Nicolas Sarkozy, quand anava èsser elegit, mas observarem qu'un còp mai, es un occitan alienat que se met al servici del chauvinisme francés.

Chauvinisme francés i a, d'efièch. L'expression « identitat nacionala », que recòrda los tèmas desvolopats per d'estats faissistas, es al singular, e non pas al plural, coma se los critèris per èsser francés foguèsson limitats, coma se se poguèsse sonque concebre una identitat francesa unenca, o coma se i aguèsse de bons franceses per oposicion a de marrits franceses.

Las primièras propòstas del ministre, que pòdon ça que la evoluïr amb lo debat, pòrtan tanben la marca del chauvinisme. Se parla de l'obligacion de far cantar cada an l'imne francés La Marseillaise per totes los escolans de l'estat. Es mesa al centre de l'identitat nacionala de França la sola lenga francesa, coma se n'i aguèsse pas jamai agut d'autras parladas dins l'estat francés, valent a dire coma se l'occitan, la lenga de la minoritat mai granda, existiguèsse pas. De biais legitim son evocats los apòrts de l'immigracion, mas s'oblida lo fach que d'autres pòbles, l'occitan, lo breton o lo basc, per exemple, son estats assimilats per l'estat francés gaireben fins a lor desparicion.

En mai d'aquò, un questionari que lo govèrn difusa evita de parlar de las minoritats etnolingüisticas (coma lo pòble occitan), de las identitats regionalas e de l'identitat europèa: aquò mòstra que lo 'debat' serà restrench, orientat e manipulat vèrs una concepcion opressiva de la nacion francesa que fa pas la mendre plaça als dreches de la nacion occitana.

Per Iniciativa per Occitània, las causas son claras :

1)Acceptarem pas que se manifèste tornar-mai lo revisionisme istoric francés que nega l'existéncia dels autres pòbles que vòl assimilar per satisfar son imperialisme, qu'ensaja de far creire que la lenga francesa es venguda comuna a totes los ciutadans de lor pròpria volontat e sens politica lingüistica repressiva, e que contunha d'amalgamar los concèptes distints d'estat, de republica e de nacion. Se pòt èsser republican sens èsser francés, e l'estat francés ten en el mai d'una nacion.

2)Apararem nòstra nacion, la nacion occitana, per afirmar son drech a conéisser sa pròpria istòria, a manténer e desvolopar sa cultura e sa lenga, e a conquistar sa libertat.

3)Definirem en plaça de l'identitat francesa tancada e chauvinista una identitat occitana dobèrta a totes e totas e sempre respectuosa de la diversitat culturala en nom de la convivéncia.